*دارت الدورة*

مولاي محمد بنشعو الادريسي//جريدة احداث الساعة 24

النهار لا فكرتوا تسدوا فيه المسيد طلعتوا جيل جديد، جيل عجيب غريب راسو قاصح وعنيد، جيل اغلبيتو مكتكلم الا بالمضا والحديد السؤال هو علاش ومناش جيلنا في هاذ الزمان مهواش؟

جيل تخسار الهضرة والكلام، ولا لسانو خايب هو السبع شايلاه يا مول المقام،
ها لا ضارب لحمو أواشم الدرعين وها لا معري على نواظرو والكتاف الله يجيب وها لا تلقاه في راس الدرب واقف صباح وليل ميزكل عزبة ولا مزوجة أمكاين غير الكريساج والنكير وها لا كل صباح على ميمتو تلقاه ينبح ما يصلح وما يخلي لا يربح مقابل غير القص والنعاس بحال البهيمة في الزريبة مفيه نفع ومصيبتو مصيبة. ياعجباه وشحال تغير هاذ الزمان وماليه الصراحة الجيل القديم كان حافظ سواريه كبير شانو ورفيع المقام في صدرو حامل القرآن مثقف واعي ميظلم الغير همة وشان بعلمو وثقافتو ضوى الزمان، جيل بصح ما ليه مثيل وبيه زاد تقوى المغرب، وحتى من التلفزة كانت تبدا مع الستة وتسالي في الحداش حيث بكري كانت القراية هي الساس وفي المدرسة محبرة وريشة ومداد بهم زيان الحال وتحقق المراد وزيدو عليهم يا الفاهمين دفتار طناش وخمسين ورقة كتب تعلم وزيد في العلم والملاهية وقتها قليل في الزنقة وحتى اللعب كان بالقياس زدنيفري وحابا وقاشقاش لا كان اللعب بلا بيهم مكيحلاش، المهم كان زمان واش من زمان زمان النية والحوايج مقضية وحتى الناس كانت راضية مرضية،،، ودارت الدورة على هاذ الزمان لا كثرو فيه المطارق وعواجو فيه المسامر وحتى سوق الدلالة سيطر الخاوي عل العامر وكثر في هاذ الزمان الذبان ودبال بلعمان وبانو كمامر بنياب كشوك الضربان تدبح وتسلخ ماتعرف دير خير ولا عندها ضمير غير سير يا خويا سير راه كثر الهبال والتهلال والتركال جيل بالمخدرات عقلو زال وخسر ليه المورال وكثرات فيه العياقة وفي زمانو زادو عبادين اللعاقة لا ميعرفوا لا أخوة ولا صداقة وميفرقو مبين حرام وحلال همهم هو جمع المال وباش ما كان، وشحال وشحال من واحد من هاذ الجيل كثر فيه لعكز والطمع في خبزة الغير فيها محنزز ومنها ينبز ميقنع وميشبع ميخدم وميردم شعارو في الحياة هو حلان الفم ولا هضر معاه حق مولانا حتى يندم دراع كاضي ولسان طويل ومتسمع منو سبحان الله غير الويل، جيل فكر في مصايب وشلة من مصيبات الكريساج والسرقة في الزناقي بالموطورات والضرب والجرح لا خلفات شلة وشلة من عاهات وكارثات وحتى الشتا في زمانهم قلات ومصبات وطغى الشر على الخير وفي زمانهم مات الاصل والضمير. علاش الضريف في زمانهم معاد ليه مكان وعلاش قبيح لفعال الخاسر ولا عندهم هو السيد المزيان.جيل كلامو قاصح أبحال المقص غريب ميهنيك ميقنعك ميداوي ليك الله يستر الكليب.
بالله عليكم يا ناس الى ما كولوا لي علاش؟ علاش سديتو في وجه هاذ الجيل المسيد حتى ولا شديد عنيد وكلبو ولا قصح من الحديد كان من المفيد تخليوه يتربى على المحبة والقرآن الكريم ويتربى على عامس ولاربعية والسمق والرجوع للزمن الجميل ويعيش طقوس فريدة تريح ليه الخاطر والبال طالب طالب يايو افرحة مو وبوه أمولات الخيمة اعطيني بيضة باش نزوق لوحتي لوحتي عند الطالب والطالب في الجنة والجنة محلولة حالها مولانا يا السامع دعانا لا تقطع رجانا.
الله الله مشات ديك ليام الزوينة راحنا عايشين في إيام الروينة والله يهدينا.