*السيد محيتيل*
جريدة احداث الساعة 24//مولاي محمد بنشعو الإدريسي
دبة الى كان دكتورنا نصاب ومحتال ولا معندوش اش غيكون اكيد قتال.
يا عجباه واحد كان كيمثل على عباد الله بلي هو طبيب الفقراء والمساكين وبلي كيبقاو فيه بزاف داك الشي علاش كيدير ليهم العمليات فابور السيد حنين بلا قياس بصح حبوه الناس الحب دام شلة سنين وهو هاذ الشي كامل ماهو الا غطاء وتشلهيب باش يبين في القنوات الخاصة والمخصصة في الخص التضامن الا مشروط مع المسكين والمزلوط وبعدما يتهز الستار تبدا مسرحيتو مسرحية انسان قلبو كبير ومزيان وميهمو لا ذهب ولا لويز ولا ماس المهم هو يداوي المساكن من الناس طبيب الفقراء الله الله على التقوى والايمان هذا الباين اما المخبي يا وعدي على بنادم المعدي كان داير الفقراء طريق يبلاني مع مراتو ونسيبو وخمسة خراين يقادوا في الخطط من اجل سرقت الملاين من الاثرياء والمحسنين ومن شلة ناس خراين الصراحة السيد الدكتور زاد فيه بزاف حيث طريق النصب والاحتيال طريق كحلة كلها ظلام ولابد غيجي النهار ويطيح وبلاناتو وخططو يديهم الريح النهار لا غيطيح فيه المحتال غدي يعاقبوه مليح وتبان حقيقتو ولو يطوال الزمان ولا يقصار وكان حتى كان قرقبو عليه سوارت الخسران من طرف شي ناس ملاح كانو حاضينو كل مساء وكل صباح الزغيبي الكعبي طاح وتلاح بعدما ولف النصب والاحتيال لا جمع منهم شلة مال وكيف مكنعرفوا الولف صعيب محطم لكليب آه ثم آه السيد الطبيب عتاقد بلي راه في لمان غير يزيد في التحياح ويبقى مع صحابو مرتاح السيد المحيتيل الدكتور حصل أوحل القضية كبرات ومبقى ليها حل حيث فيها حتى مراتو وخوه وخمسة خراين العفاريت دايرين شلة زبايل وشلة فعايل فعايل شياطين الانس لا موجودين بزاف في هاذ البلاد
متهمهم غير نفسهم حيث حسبين روسهم سياد وهوما فوق العباد
لكن الله كبير هو القادر يفضحهم ويقطع عليهم الزاد ويبعد عليهم تحقيق المراد واعجباه عليك يا ليام شحال من نصاب ومحتال وركوا كاطريام ساعة لقاو روسهم وسط عكاشة ضاير بيهم شحال من سجان وهذا هو واقعهم الجديد لا خلاهم يفيقوا من الاحلام جاتهم دغية الندامة لكن واش يسمح ليهم رب مولانا الصراحة خسرات ليهم الكانة لكن فات الفوت حيث داروا شلة قوالب وبهوت على الخوت دبة راه مينفع ندام حيث ذنوبهم بالعرام
فيق يالفايق العايق فيق فيق دير القانون عشيرك ويكون ليك حبيب رفيق يحميك ديمة ويرشدك للطريق ويكون ليك صديق وفهم الى بغيتي تفهم قبل متندم وبلى مدير براسك عايق وفايق.
